«Қазіргі заманғы қазақ романы» сайты арқылы үміткерлер талабын танытып, конкурсқа қатысу шарты бойынша болашақ романдарының жобасын жолдады. Сайтқа барлығы 220 жоба түсті.
«Қазіргі заманғы қазақ романы» әдеби бірлестігінің жұмыс тобы жобаларды сұрыптау барысында оның бірнешеуін іркіп қалды.
Біріншіден: Әлі мектеп оқушылары жолдаған жобалардың өтінімі қарастырылмады.
Екіншіден: Конкурс талабына романның аты немесе автордың дерегі көрсетілмеген жобалардың өтінімі қарастырылмады.
Үшіншіден: Сөйлемдегі сөздері бір-бірімен қиыспайтын, әрі әріп қателері көп жобалардың өтінімі қарастырылмады.
Төртіншіден: Бір автор жолдаған бірнеше роман жобаларының өтінімі қарастырылмады.

«Қазіргі заманғы қазақ романы» әдеби бірлестігі «Қазіргі заманғы қазақ романы» конкурсының бірінші және екінші кезеңдерін аяқтаған болатын. Сарапшылар жеті романның жобасын мақұлдап, соңғы үшінші кезеңге жолдама берген еді. 
Осы шешімнен кейін «Қазіргі заманғы қазақ романы» әдеби бірлестігіне конкурстың құрылтайшысы және демеушісі, ERG компаниясының директорлар кеңесінің төрағасы Шухрат Алиджанұлы Ибрагимов хабарласты. Ол болашақ жеті роман авторларының қатарында жас жазушылардың  жоқтығын байқап, олар үшін конкурстан тыс қосымша бір орын беретіні туралы хабарлады.
Сарапшылар жастар ұсынған жобалар арасынан Айым Ақылтайдың «Қарыз» романының жобасын  үшінші кезеңге жіберуге шешім қабылдады. 
Өз туындысын «Қазіргі заманғы қазақ романы» конкурсының аясында жазуға мүмкіндік алған қаламгерлер Думан Рамазан, Жүсіпбек Қорғасбек, Қуаныш Жиенбай, Нұржан Қуантайұлы, Асқар Алтай, Мұрат Алмасбек, Қуат Бораштың қатарына енді қарындастары Айым Ақылтай қосылды.
«Қазіргі заманғы қазақ романы» әдеби бірлестігі конкурстың шешуші бөлігіне өткен сегізінші авторды да құттықтап, одан арғы жұмысына табыс тілейді!